ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑭᒃᑰᖕᒪᖔᑕ

ᐱᒋᐊᕈᑎᖓ – ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ “ᑎᓕᔭᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖑᑉᓗᑎᒃ”, ᑭᒡᒐᖅᑐᐃᔨᐅᔪᑦ ᐃᓄᐃᑦ ᐱᔫᒥᒋᔭᖏᓐᓂᒃ ᑭᕙᓪᓕᕐᒥ, ᐊᔭᐅᖅᑐᐃᔨᐅᔪᑦ, ᐊᐅᓚᑦᑎᔨᐅᔪᑦ ᐊᒻᒪᓗ ᖃᐅᔨᓴᖅᑎᐅᔪᑦ ᓄᓇᕗᒥ ᓄᓇᑖᕐᓂᒃᑯᑦ ᐊᖏᕈᑎᓕᐊᒃᑯᑦ ᑭᕙᓪᓕᕐᒥ.

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑐᕌᒐᕆᔭᖓ ᑭᒡᒐᖅᑐᐃᓂᖅ, ᐊᔾᔨᒌᒃᑎᑦᑎᓂᒃᑯᑦ ᐊᒻᒪᓗ ᐃᖕᒥᓂᒡᓗ ᐊᐅᓚᑦᑎᓂᒃᑯᑦ, ᐃᓄᖕᓂᒃ ᐱᕙᓪᓕᐊᑎᑦᑎᓂᒃᑯᑦ, ᓴᐳᓐᓂᐊᕐᓂᒃᑯᑦ, ᐊᐅᓚᑦᑎᓂᒃᑯᑦ ᐊᒻᒪᓗ ᖁᕝᕙᖅᑎᕆᓂᒃᑯᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᑲᔫᑎᖏᓐᓂᒃ ᓄᓇᖃᖅᑳᖅᑑᑎᓪᓗᒋᑦ; ᖁᕝᕙᖅᑎᕆᓂᕐᒧᓪᓗ ᑮᓇᐅᔾᔭᒃᓴᕈᑎᒃᓴᖏᓐᓂᒃ, ᐃᓅᖃᑎᒌᒍᑎᖏᓐᓂᒃ ᐊᒻᒪᓗ ᐃᓕᖅᑯᓯᑐᖃᑎᒍᑦ ᖃᓄᐃᙱᑦᑎᐊᕈᓐᓇᖁᑉᓗᒋᑦ ᓯᕗᓂᒃᓴᕆᔭᒃᑯᑦ.

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑐᕌᒐᕆᔭᖓᓄᑦ ᑎᑭᑦᑎᐊᕈᓐᓇᖁᑉᓗᒋᑦ ᐃᒪᓐᓇᐃᑦᑕᕆᐊᓖᑦ:

  • ᐸᐸᑐᕐᓂᖅ ᐃᓄᐃᑦ ᐃᑦᓴᕐᓂᑕᕆᔭᖏᓐᓂᒃ, ᐃᓕᖅᑯᓯᑐᖃᖓᓂᒃ ᐊᒻᒪᓗ ᐅᖃᐅᓯᖓᓂᒃ.
  • ᐊᐅᓚᑦᑎᓂᖅ ᐃᓄᐃᑦ ᓄᓇᖁᑎᖏᓐᓂᒃ ᑭᕙᓪᓕᕐᒥ ᐊᒻᒪᓗ ᑐᓴᐅᒪᑎᑦᑎᖃᑦᑕᕐᓂᖅ ᐅᖃᖃᑎᖃᖃᑦᑕᕐᓂᕐᓗ ᓄᓇᑖᖅᓯᒪᔪᓂᒃ ᓄᓇᐃᑦ ᐊᑐᖅᑕᐅᖃᑦᑕᕐᓂᖏᓐᓄᑦ.
  • ᒥᐊᓂᖅᓯᓂᖅ ᐅᑭᐅᖅᑕᖅᑐᒥ ᐆᒪᔪᓂᒃ ᐊᒻᒪᓗ ᐊᕙᑎᑉᑎᓐᓂᒃ, ᑕᒡᕘᓇ ᐸᐸᑐᕐᓂᖅ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᖃᑦᑕᓚᐅᖅᑐᓂᒃ ᒫᓐᓇᐅᔪᖅ ᐊᑐᖅᑕᐅᔪᓐᓇᖅᓯᖁᑉᓗᒋᑦ ᐊᒻᒪᓗ ᓯᕗᓂᒃᓴᕆᔭᑉᑎᓐᓄᑦ.
  • ᐃᑲᔪᕈᒪᑉᓗᒋᑦ ᐃᓄᐃᑦ ᑭᕙᓪᓕᕐᒥ ᐃᓕᓐᓂᐊᒃᑲᓐᓂᕈᓐᓇᕐᓂᒃᑯᑦ ᐊᒻᒪᓗ ᐸᕐᓇᐃᓂᕐᒧᑦ ᓄᓇᕗᒥ.