ᐱᓕᕆᕝᕖᑦ

ᐱᓕᕆᕝᕖᑦ

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓯᑕᒪᓂᒃ ᐱᓕᕆᕝᕕᓖᑦ ᐊᐅᓚᑦᑎᔨᐅᔪᓂᒃ – ᓄᓇᓕᕆᔨᒃᑯᑦ, ᐸᕐᓇᐃᔨᒃᑯᑦ ᐊᑐᓕᖅᑎᕆᔨᒃᑯᓪᓗ, ᐃᓅᓯᓕᕆᔨᒃᑯᑦ ᐊᒻᒪᓗ ᐃᓄᐃᑦ ᐃᑲᔫᑎᖏᓐᓂᒃ ᐱᔨᑦᓯᕋᖅᑕᐅᔾᔪᑎᖏᓐᓂᒡᓗ ᑲᒪᔨᒃᑯᑦ. ᐊᐅᓚᑦᑎᔨᒃᑯᑦ ᐱᓕᕆᕝᕕᖓ, ᑮᓇᐅᔭᓕᕆᔨᒃᑯᑦ, ᐊᒻᒪᓗ ᑐᓴᐅᒪᖃᑦᑕᐅᑎᓕᕆᔨᒃᑯᑦ ᐱᓕᕆᕙᒃᑐᑦ ᐱᓕᕆᖃᑎᒌᖕᓂᒃᑯᑦ ᐃᑲᔫᑕᐅᖁᑉᓗᒋᑦ ᐱᓕᕆᐊᕆᕙᒃᑕᖏᑦᑎᒍᑦ.

ᐊᐅᓚᑦᑎᔨᒃᑯᑦ

ᐊᐅᓚᑦᑎᔨᒃᑯᑦ ᐱᒻᒪᕆᐊᓗᐃᑦ ᓯᕗᓂᒃᓴᒧᑦ ᑐᕌᖓᔪᒃᑯᑦ, ᖃᓄᖅᑑᕈᒪᓂᕐᒧᓪᓗ ᑕᐅᑐᕐᕉᕐᓂᒃᑯᑦ ᐊᒻᒪᓗ ᐸᕐᓇᐃᓂᕐᒧᑦ ᑲᑎᒪᔨᓂᒃ ᐊᐅᓚᑦᑎᔨᐅᓂᒃᑯᑦ, ᐅᑉᓗᑕᒫᒃᑯᓪᓗ ᐊᐅᓚᑦᑎᓂᕆᔭᐅᕙᒃᑐᓄᑦ.

ᐊᐅᓚᑦᑎᔨᒃᑯᑦ ᐅᔾᔨᖅᑐᖅᐸᒃᑐᑦ ᐊᐅᓚᑦᑎᓂᕆᔭᐅᔪᓂᒃ ᑕᒪᐃᓐᓄᑦ ᐱᓕᕆᕝᕕᐅᔪᓄᑦ ᐋᖅᑭᒃᓱᐃᕙᒃᖢᑎᒃ ᖃᓄᐃᓕᐅᕈᑕᐅᔪᓂᒃ ᐊᒻᒪᓗ ᐊᑐᐃᓐᓇᕈᖅᑎᑦᑎᕙᒃᖢᑎᒃ ᐊᑐᖅᑕᐅᔭᕆᐊᓕᖕᓂᒃ ᑲᒪᔪᓐᓇᖁᑉᓗᒋᑦ ᐱᓕᕆᐊᕆᔭᕆᐊᖃᖅᑕᖏᓐᓂᒃ.

ᐊᐅᓚᑦᑎᔨᒃᑯᑦ ᐱᓕᕆᐊᒃᓴᓖᑦ ᑲᒪᔨᐅᔪᑦ ᑕᒪᐃᓐᓂᒃ ᓴᓇᔭᒃᓴᖅᑖᖅᑐᓕᕆᓂᕐᒧᑦ ᑐᕌᖓᔪᓂᒃ, ᒪᓕᒐᓕᕆᓂᕐᒧᑦ, ᐊᐅᓚᑦᑎᔾᔪᑎᓄᑦ, ᐃᑲᔫᑎᓂᒃ ᐊᒻᒪᓗ ᐱᔨᑦᓯᕋᐅᑎᓂᒃ, ᐊᒻᒪᓗ ᑭᐅᓯᖃᑦᑕᕆᐊᓖᑦ ᑲᑎᒪᔨᓄᑦ.

ᑮᓇᐅᔭᓕᕆᔨᒃᑯᑦ

ᑮᓇᐅᔭᓕᕆᔨᒃᑯᑦ ᑮᓇᐅᔭᓕᕆᔨᒋᔭᐅᔪᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ, ᑲᒪᔨᒋᔭᐅᔪᑦ ᐅᔾᔨᖅᑐᖅᑎᐅᑉᓗᑎᒃ ᑮᓇᐅᔭᖏᓐᓂᒃ, ᑮᓇᐅᔭᓕᕆᔾᔪᑎᖏᓐᓂᒃ, ᑮᓇᐅᔭᒃᓴᓂᒃ ᓴᖅᑭᑎᑦᑎᖃᑦᑕᕐᓂᕐᒧᑦ, ᐊᒻᒪᓗ ᐋᖅᑭᐅᒪᑎᑦᑎᔩᑦ ᑲᑐᔾᔨᖃᑎᒌᒃᑯᑦ ᑮᓇᐅᔭᖃᕐᕕᖏᓐᓂᒃ, ᐊᑭᓕᕆᐊᖃᖅᑕᖏᓐᓂᒃ ᑮᓇᐅᔭᖅᑖᖑᔭᕆᐊᓕᖕᓂᒡᓗ, ᐅᓂᑉᑳᓕᐊᓂᒡᓗ, ᓇᓪᓕᐅᒃᑯᒫᓂᒃ ᐊᒻᒪᓗ ᐃᑲᔫᑎᓂᒃ. ᐱᔨᑦᓯᕋᐅᑎᖏᑦ ᐅᖓᑖᓃᓲᑦ ᐊᐅᓚᑦᑎᑐᐃᓐᓇᕐᓂᒃᑯᑦ ᐃᑲᔪᖅᑐᐃᓂᒃᑯᑦ; ᑮᓇᐅᔭᓕᕆᔨᒃᑯᑦ ᐃᑲᔪᖃᑦᑕᕐᒥᔪᑦ ᐊᓯᖏᓐᓂᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐱᓕᕆᕝᕕᖏᓐᓂᒃ ᓴᖅᑭᑎᑦᑎᓂᐊᖅᑎᓪᓗᒋᑦ ᑮᓇᐅᔭᖁᑎᒋᓂᐊᖅᑕᖏᓐᓂᒃ, ᑮᓇᐅᔭᓕᕆᓂᒃᑯᑦ ᐊᐅᓚᑦᑎᔾᔪᑎᖏᓐᓂᒃ ᐊᒻᒪᓗ ᐅᓂᑉᑳᓕᐊᖏᓐᓂᒃ, ᐊᒻᒪᓗ ᐃᑲᔪᖃᑦᑕᖅᑐᑦ ᓯᕗᓂᒃᓴᒧᑦ ᐅᖓᓯᒃᑐᒧᑦ ᐸᕐᓇᐃᓂᕐᒥᒃ ᑐᓴᖅᑎᑦᑎᕙᒃᖢᑎᒃ ᑮᓇᐅᔭᓕᕆᔾᔪᑕᐅᖃᑦᑕᖅᓯᒪᔪᓂᒃ ᐊᒻᒪᓗ ᓂᕆᐅᒋᔭᐅᔪᓂᒃ.

ᓄᓇᓕᕆᔨᒃᑯᑦ

ᓄᓇᓕᕆᔨᒃᑯᑦ ᑲᒪᔨᐅᔪᑦ ᐃᓄᐃᑦ ᓄᓇᖁᑎᖏᑦ ᐊᑐᖅᑕᐅᑦᑎᐊᖃᑦᑕᖁᑉᓗᒋᑦ ᒪᓕᒡᓗᑎᒃ ᒪᓕᒐᕆᔭᐅᔪᓂᒃ ᐱᓕᕆᐊᒃᓴᕆᔭᐅᔪᓂᒡᓗ ᓄᓇᕗᒥ ᐊᖏᕈᑎᓕᐊᕐᒦᑦᑐᓂᒃ ᐊᒻᒪᓗ ᒥᐊᓂᖅᓯᑦᑎᐊᖏᓐᓇᕋᓱᒋᐊᓖᑦ ᓯᕗᓂᒃᓴᒧᑦ ᐅᖓᓯᒃᑐᒧᑦ ᐃᓄᐃᑦ ᐱᔫᒥᒋᔭᖏᓐᓂᒃ ᐃᓱᒪᒋᔭᖃᕐᓗᑎᒃ ᐱᔭᐅᔭᕆᐊᓕᖕᓂᒃ ᐱᕙᓪᓕᐊᑎᑦᑎᓂᕐᒧᑦ ᒥᐊᓂᖅᓯᑦᑎᐊᕐᓗᑎᒡᓗ ᐊᕙᑎᑉᑎᓐᓂᒃ.

ᓄᓇᓕᕆᔨᒃᑯᑦ ᐃᓕᕆᖃᑎᖃᖅᐸᒃᑐᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓂᒃ ᓴᖅᑭᑎᑦᑎᓂᕐᒧᑦ ᒪᓕᒐᓂᒃ ᐊᒻᒪᓗ ᐊᑐᐊᒐᓂᒃ ᐊᐅᓚᑦᑎᓂᕐᒧᑦ ᖃᐅᔨᓴᐃᓂᒃᑯᓪᓗ ᑲᒪᒋᔭᐅᔭᕆᐊᓕᖕᓂᒃ ᐃᓄᐃᑦ ᓄᓇᖁᑎᖏᓐᓂᒃ ᑭᕙᓪᓕᕐᒥ. ᐱᓕᕆᕙᒃᑐᑦ ᓄᓇᒥᒃ ᐊᑐᖅᑐᑦ ᒪᓕᒃᑕᐅᔭᕆᐊᓕᖕᓂᒃ ᒪᓕᑦᑎᐊᕋᓗᐊᕐᒪᖔᑕ ᖃᐅᔨᓴᐃᖃᑦᑕᖅᖢᑎᒃ ᒪᓕᑦᑎᐊᕐᒪᖔᑕ ᒪᓕᒃᑕᒃᓴᓂᒃ, ᒪᓕᒐᕆᔭᐅᔪᓂᒃ ᐊᒻᒪᓗ ᐊᑐᐊᒐᕆᔭᐅᔪᓂᒃ ᓴᐳᓐᓂᐊᕐᓂᕐᒧᑦ ᐃᓄᐃᑦ ᐱᔪᓐᓇᐅᑎᒋᔭᖏᓐᓂᒃ ᓄᓇᒥ. ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓕᐊᖅ ᓇᓗᓇᐃᖅᓯᓯᒪᔪᖅ “ᓄᓇᒥᒃ” ᐃᓚᐅᖃᑕᐅᑉᓗᒍ ᐃᒪᖅ ᐊᒻᒪᓗ ᐊᑐᖅᑕᐅᔪᓐᓇᖅᑐᑦ ᓄᓇᒥ ᐃᓚᐅᖃᑕᐅᑉᓗᒋᑦ ᐆᒪᔪᑦ.

ᐸᕐᓇᐃᔨᒃᑯᑦ ᐊᑐᓕᖅᑎᕆᔨᒃᑯᓪᓗ

ᐸᕐᓇᐃᔨᒃᑯᑦ ᐊᑐᓕᖅᑎᕆᔨᒃᑯᓪᓗ ᐋᔩᖃᑎᒌᒍᑎᖃᓲᑦ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓂᒃ ᐊᒻᒪᓗ ᐊᓯᖏᓐᓂᒃ ᐊᖏᕈᑎᓂᒃ ᐱᓕᕆᕝᕕᒡᔪᐊᒃᑯᑦ, ᒐᕙᒪᒃᑯᑎᒍᑦ ᐊᒻᒪᓗ ᐊᓯᖏᑦᑎᒍᑦ ᐱᓕᕆᖃᑎᒋᔭᖏᑦᑎᒍᑦ ᓴᖅᑭᑎᑕᐅᕙᒃᑐᒃᑯᑦ ᐊᑐᕈᒪᔪᓂᒃ ᐃᓄᐃᑦ ᓄᓇᖁᑎᖏᓐᓂᒃ, ᐊᒻᒪᓗ ᐃᓚᐅᖃᑕᐅᕙᒃᑐᑦ ᐊᐅᓚᑦᑎᓂᕐᒧᑦ ᐱᕙᓪᓕᐊᑎᑕᐅᔪᒪᔪᓂᒃ ᐱᔾᔪᑎᒋᑉᓗᒋᑦ ᐃᓄᐃᑦ ᑭᕙᓪᓕᕐᒥ ᐃᓄᐃᑦ ᐱᕚᓪᓕᕈᑎᒃᓴᖏᑦ ᓴᖅᑭᑎᑕᐅᔪᓐᓇᖁᑉᓗᒋᑦ.

ᐸᕐᓇᐃᔨᒃᑯᑦ ᐊᑐᓕᖅᑎᕆᔨᒃᑯᓪᓗ ᐱᒋᐊᖅᑎᑦᑎᔨᐅᕙᒃᑐᑦ ᐊᓯᖏᓐᓂᒃ ᐋᔩᖃᑎᒌᒍᑕᐅᔭᕆᐊᓕᖕᓂᒃ ᓄᓇᕗᒥ ᓄᓇᑖᕐᓂᒃᑯᑦ ᐊᖏᕈᑎᓕᐊᒃᑯᑦ ᐃᓚᐅᖃᑕᐅᑉᓗᒍ ᒪᓂᑑᐸᒥ ᐃᖅᑭᓖᑦ ᓄᓇᖓᖑᑦ ᖃᓕᕇᓕᖅᓯᒪᓂᕋᖅᑕᐅᔫᑉ ᒥᒃᓵᓄᑦ ᐊᖏᕈᑎ ᐊᒻᒪᓗ ᐊᑕᐹᔅᑲᒥᐅᑦ ᐃᖅᑭᓖᑦ ᓄᓇᖓᒍᑦ ᖃᓕᕇᓕᖅᓯᒪᓂᕋᖅᑕᐅᔪᒃᑯᑦ ᐊᖏᕈᑎ ᐊᒻᒪᓗ ᐅᖃᖃᑎᒌᒍᑏᑦ ᓇᓗᓇᐃᔭᐃᓂᕐᒧᑦ ᓄᓇᓂᒃ ᒐᕙᒪᑐᖃᒃᑯᓐᓄᑦ ᑲᓇᑕᒥ ᐃᑦᓴᕐᓂᑕᓕᕆᓂᒃᑯᑦ ᑰᑦ ᒥᒃᓵᓄᑦ ᐱᓕᕆᐊᖑᕙᒃᑐᓂᒃ, ᑲᓇᑕᒥ ᐆᒪᔪᓕᕆᓂᒃᑯᑦ ᐱᔨᑦᓯᕋᖅᑐᐅᔪᓄᑦ ᐊᒻᒪᓗ ᐊᓯᖏᓐᓄᑦ ᒐᕙᒪᑐᖃᒃᑯᑦ ᑎᒥᖁᑎᖏᓐᓄᑦ.

ᑖᒻᓇ ᐱᓕᕆᕝᕕᒃ ᐃᓚᐅᖃᑕᐅᖃᑦᑕᕐᒥᔪᖅ ᐊᒥᓱᓂᒃ ᐊᐅᓚᑦᑎᔨᐅᔪᑦ ᑎᒥᖁᑎᖏᓐᓂᒃ ᐊᐅᓚᑦᑎᓂᕐᒧᑦ ᓄᓇᕗᒥ ᓄᓇᖁᑎᒋᔭᐅᔪᓂᒃ, ᐆᒪᔪᓂᒃ, ᐊᒻᒪᓗ ᐊᑐᖅᑕᐅᔪᓐᓇᖅᑐᓂᒃ; ᐱᓕᕆᖃᑎᖃᖅᐸᒃᖢᑎᒃ ᓲᕐᓗ ᐅᑯᓂᙵ ᐃᓄᐃᑦ ᐃᑦᓴᕐᓂᑕᖏᓐᓂᒃ ᐸᐸᑦᑎᔨᒃᑯᓐᓂᒃ, ᓄᓇᕗᒥ ᐊᕙᑎᓕᕆᓂᒃᑯᑦ ᑲᑎᒪᔨᓂᒃ, ᓄᓇᕗᒥ ᐸᕐᓇᐃᔨᒃᑯᑦ ᑲᑎᒪᔨᖏᓐᓂᒃ, ᓄᓇᕗᒥ ᐃᒪᕐᒧᑦ ᑲᑎᒪᔨᓂᒃ, ᐊᒻᒪᓗ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᓴᖅᑭᑎᑦᑎᓲᑦ ᐊᑐᓕᖁᔭᒥᓂᒃ ᑎᒃᑯᐊᖅᑕᐅᔾᔪᑕᐅᕙᒃᑐᒃᑯᑦ ᑎᒥᖁᑎᒋᔭᐅᔪᓄᑦ ᒐᕙᒪᒃᑯᓐᓄᑦ.

ᐃᓅᓯᓕᕆᔨᒃᑯᑦ

ᐃᓅᓯᓕᕆᔨᒃᑯᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᑲᒪᔨᐅᔪᑦ ᓴᐳᓐᓂᐊᕐᓂᕐᒧᑦ ᖁᕝᕙᖅᑎᕆᓂᕐᒧᓪᓗ ᐃᓄᐃᑦ ᐃᓕᖅᑯᓯᑐᖃᖓᓂᒃ, ᐃᓅᖃᑎᒌᒃᑐᑦ ᐱᒻᒪᕆᐅᑎᑕᖏᓐᓂᒃ ᐊᒻᒪᓗ ᐅᖃᐅᓯᕐᒥᒃ. ᐃᓅᓯᓕᕆᔨᒃᑯᑦ ᖁᕝᕙᖅᑎᕆᓇᓱᓲᑦ ᐃᓅᖃᑎᒌᒃᑐᓂᒃ ᑭᕙᓪᓕᕐᒥᐅᓂᒃ ᐃᓕᖅᑯᓯᑐᖃᑎᒍᑦ ᖃᓄᐃᓕᐅᖅᑎᑦᑎᕈᓘᔭᖅᐸᒃᖢᑎᒃ ᐃᑲᔫᑎᓂᒡᓗ ᓴᖅᑭᑎᑦᑎᕙᒃᖢᑎᒃ ᐃᑲᔫᑎᒃᓴᓂᒃ ᓴᙱᓂᖅᓴᒃᑯᑦ ᐃᓅᖃᑎᒌᑦᑎᐊᕐᓂᖅᓴᐅᓕᕈᓐᓇᖁᑉᓗᒋᑦ ᐃᓕᖅᑯᓯᑐᖃᑎᒍᑦ ᖃᐅᔨᒪᔭᐅᔪᒃᑯᑦ.

ᐃᓄᐃᑦ ᐃᑲᔫᑎᖏᓐᓂᒃ ᐱᔨᑦᓯᕋᖅᑕᐅᔾᔪᑎᒃᓴᖏᓐᓂᒡᓗ ᑲᒪᔩᑦ

ᐃᓄᐃᑦ ᐃᑲᔫᑎᖏᓐᓂᒃ ᐱᔨᑦᓯᕋᖅᑕᐅᔾᔪᑎᒃᓴᖏᓐᓂᒡᓗ ᑲᒪᔩᑦ ᓴᖅᑭᑎᑦᑎᓇᓱᒃᐸᒃᑐᑦ ᓴᓇᔭᒃᓴᓂᒃ, ᐃᓕᓐᓂᐊᒃᑲᓐᓂᕈᑎᒃᓴᓂᒃ ᐊᒻᒪᓗ ᑮᓇᐅᔾᔭᒃᓴᕈᑎᒃᓴᓂᒃ ᐃᑲᔫᑎᓂᒃ ᓴᖅᑭᑉᐸᓪᓕᐊᔪᓐᓇᖁᑉᓗᒋᑦ ᓂᐅᕕᐊᖑᔪᒪᕙᒃᑐᑦ ᐊᒻᒪᓗ ᐱᔨᑦᓯᕋᖅᐸᒃᑐᑦ ᐃᑲᔫᑎᒃᓴᓂᒃ ᐃᓚᐅᖃᑕᐅᔪᓐᓇᖁᑉᓗᒋᑦ ᐃᓄᐃᑦ ᑭᕙᓪᓕᕐᒥ ᐱᕚᓪᓕᕈᓐᓇᖁᑉᓗᒋᑦ ᑮᓇᐅᔾᔭᒃᓴᕈᑎᒃᓴᒃᑯᑦ ᐱᕕᒃᓴᕆᔭᐅᔪᒃᑯᑦ.

ᑖᒻᓇ ᐱᓕᕆᕝᕕᒃ ᓇᓗᓇᐃᔭᐃᓲᖅ ᓱᕗᓪᓕᖅᐸᐅᑎᑦᑐᒪᔭᖏᓐᓂᒃ ᖃᓄᖅᑑᕈᑎᒃᓴᒃᑯᑦ ᓴᖅᑭᑎᑕᐅᓯᒪᔪᓂᒃ ᐃᓅᖃᑎᒌᖕᓂᒃᑯᑦ ᐱᕙᓪᓕᐊᑎᑦᑎᓂᒃᑯᓪᓗ ᓴᖅᑭᑎᑦᑎᕙᓪᓕᐊᓂᕐᒧᑦ ᐱᕕᒃᓴᕆᔭᐅᔪᓂᒃ ᓴᖅᑭᑎᑕᐅᕙᓪᓕᐊᔪᓂᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᖃᓄᐃᓕᐅᖅᑎᑦᑎᔾᔪᑎᒋᔭᖏᑦᑎᒍᑦ ᐊᒻᒪᓗ ᑭᐅᓯᔾᔪᑕᐅᑉᓗᑎᒃ ᐱᔭᐅᔪᒪᔪᒃᑯᑦ ᖃᐅᔨᓴᕈᑕᐅᓚᐅᖅᑐᓂᒃ ᑭᕙᓪᓕᕐᒥ.

ᐃᑲᔫᑏᑦ ᐊᒻᒪᓗ ᐱᔨᑦᓯᕋᖅᑕᐅᔾᔪᑎᒃᓴᑦ ᐅᑯᐊᖑᕙᒃᑐᑦ:

  • ᐃᓕᓐᓂᐊᕈᑏᑦ ᖁᑦᑎᖕᓂᖅᓴᓄᑦ ᓴᓇᔭᒃᓴᖅᑖᖑᔪᓐᓇᖅᑐᓄᑦ;
  • ᐊᔪᕈᓐᓃᖅᓴᒃᑲᓐᓂᕈᓐᓇᖁᑉᓗᒋᑦ ᐃᓕᓐᓂᐊᕈᑏᑦ;
  • ᐃᑲᔫᑏᑦ ᒪᒃᑯᒃᑐᓄᑦ;
  • ᐃᑲᔫᑏᑦ ᑕᐃᑉᑯᓄᙵ ᑎᒥᒥᒍᑦ ᐊᔪᕈᑎᓕᖕᓄᑦ;
  • ᐊᑐᕈᓐᓇᕐᓂᖅ ᐸᐃᕆᕝᕕᖕᓂᒃ; ᐊᒻᒪᓗ
  • ᐃᑲᔫᑏᑦ ᓇᖕᒥᓂᖅᑕᖅᑐᕈᓐᓇᕐᓂᕐᒧᑦ ᐊᒻᒪᓗ ᐃᓄᐃᑦ ᓇᖕᒥᓂᖅᑖᕈᑎᒋᔪᓐᓇᖅᑕᖏᓐᓄᑦ.

ᑐᓴᐅᒪᖃᑦᑕᐅᑎᓕᕆᔨᒃᑯᑦ

ᐱᓕᕆᐊᒃᓴᕆᔭᐅᓪᓚᕆᖃᑦᑕᖅᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ ᓴᙱᒃᑎᑦᑎᕙᓪᓕᐊᓇᓱᒃᖢᑎᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐱᓕᕆᐊᒃᓴᖏᓐᓂᒃ ᐊᒻᒪᓗ ᐅᔾᔨᕆᔭᐅᓕᖅᑎᑦᑎᓇᓱᓲᑦ ᐃᑲᔫᑎᓂᒃ ᖃᓄᐃᓕᐅᕈᑕᐅᕙᒃᑐᓂᒡᓗ. ᑕᐃᒪᐃᓕᐅᕐᓂᐊᕐᓗᑎᒃ, ᑐᓴᐅᒪᖃᑦᑕᐅᑎᓕᕆᔨᒃᑯᑦ ᐱᓕᕆᖃᑎᖃᑦᑎᐊᓲᑦ ᑕᒪᐃᓐᓂᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐱᓕᕆᕝᕕᖏᓐᓂᒃ ᐋᖅᑭᒃᓱᐃᖃᑎᒋᑉᓗᒋᑦ ᖃᓄᖅ ᑐᓴᒐᒃᓴᑦ ᓅᑉᐸᓪᓕᐊᓂᐊᕐᒪᖔᑕ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᓐᓂᒃ ᐃᓄᖕᓄᑦ ᑭᕙᓪᓕᕐᒥ ᑐᓴᒐᒃᓴᓕᕆᔾᔪᑎᒃᑯᑦ ᐃᓚᐅᖃᑕᐅᑉᓗᒋᑦ ᓄᓇᓕᖕᓂ ᑐᓴᐅᒪᖃᑦᑕᐅᑎᓕᕆᔨᒃᑯᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ Facebook-ᖓ ᐊᒻᒪᓗ ᐃᑭᐊᖅᑭᕕᒃ.

ᑐᓴᐅᒪᖃᑦᑕᐅᑎᓕᕆᔨᒃᑯᑦ ᓴᖅᑭᑦᑎᖃᑦᑕᕐᒥᔪᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐅᑭᐅᑉ ᐃᓗᐊᓂ ᓯᑕᒪᐃᖅᖢᑎᒃ ᑐᓴᒐᒃᓴᖓᓂᒃ ᐊᒻᒪᓗ ᐊᕐᕌᒍᑕᒫᒃᑯᑦ ᐅᓂᑉᑳᓕᐊᖓᓂᒃ, ᐃᓗᓕᖃᖅᖢᑎᒃ ᐊᓯᖏᓐᓂᒃ ᑐᓴᒐᒃᓴᓂᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᖃᓄᐃᓕᐅᕈᑎᒋᕙᒃᑕᖏᓐᓂᒃ ᐊᒻᒪᓗ ᐃᑲᔫᑎᖏᑦᑕ ᒥᒃᓵᓄᑦ ᑐᕌᖓᔪᓂᒃ.

ᑐᓴᐅᒪᖃᑦᑕᐅᑎᓕᕆᔨᒃᑯᑦ

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑐᓴᐅᒪᖃᑦᑕᐅᑎᓕᕆᔨᒃᑯᖏᑦᑕ ᐱᓕᕆᐊᒃᓴᖏᓐᓄᑦ ᓇᓗᓇᐃᔭᐅᑎ ᓯᕕᑐᔫᔪᖅ ᐊᒻᒪᓗ ᐃᓗᓕᖃᖅᑐᖅ ᐃᑲᔫᑎᓂᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓂᙶᖅᑐᓂᒃ; ᐱᒻᒪᕆᐊᓗᒃᑯᑦ ᑐᓴᐅᒪᖃᑦᑕᐅᑎᓕᕆᔨᐅᔪᑦ ᐱᓕᕆᖃᑎᖃᖅᐸᒃᖢᑎᒃ ᐊᔾᔨᒌᙱᑦᑑᑕᐅᔪᓂᒃ ᑎᒥᐅᔪᓂᒃ ᐊᒻᒪᓗ ᑲᑎᒪᔨᕋᓛᓂᒃ ᐅᑯᐊ ᐃᓚᐅᖃᑕᐅᑉᓗᒋᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑕ ᐊᑎᓕᕆᔨᖏᑦ, ᐃᓚᐃᖅᑐᑦ ᖁᓚᕆᔭᖃᖅᑐᓪᓗ ᐃᑲᔫᑎᖏᑦ ᐊᒻᒪᓗ ᓄᓇᓕᖕᓂ ᓄᓇᓕᕆᔨᒃᑯᑦ ᑲᑎᒪᔨᖏᑦ.

ᓄᓇᓕᖕᓂ ᑐᓴᐅᒪᖃᑦᑕᐅᑎᓕᕆᔨᒃᑯᑦ ᐃᑲᔪᖃᑦᑕᕐᒥᔪᑦ ᖃᑯᑎᒃᑯᑦ ᐊᓯᖏᓐᓂᒃ ᓄᓇᓕᖕᓂ ᖃᓄᐃᓕᐅᕈᑕᐅᔪᒃᑯᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐃᑲᔪᖅᑐᖅᐸᒃᑕᖏᓐᓂᒃ ᐱᓕᕆᖃᑎᖃᕐᓂᒃᑯᑦ ᐊᒻᒪᓗ ᐱᓕᕆᕝᕕᖏᑦᑕ ᖃᓄᐃᓕᐅᕈᑎᒋᔭᖏᑦᑎᒍᑦ.